SAJAK SUNDA RIAN IBAYANA, RUBRIK LAWUNG 5 DESEMBER 2020

 

Sajak Tina Ajalna Sang Bentang Pilem*

 

Di hiji bisokop

Aya rusiah di sajeroning rusiah,

Kabuka tina lambaran sandiwara

Lalakon getih, lalakon raheut gudawang.

 

Aya lalakon dina sajeroning lalakon

Nu jadi marga lantaran lahirna lalakon anyar

Nu kaambeu tina seungit parfum

Seungit nu moal bisa leungit

Bukti kalayan nyata, telengesna hiji manusa.

 

Di hiji bisokop

Aya rusiah nu muka rusiah anyar

Patekadan goréng ngajirim balati,

Nu nembrag kana dada

Mungkas rénghap jeung harepan.

 

*Judul Carpon Almarhum Pak Duduh Durahman

Januari 2020

 

 

 

 

 

 

Mangsa

 

Kiceup

Geus teu kaitung deui lobana kiceup nu ngandung kecap

Mangsa nyakséni ciptaan Anjeun, neuleuman kaéndahan, boh lahirna, boh batinna.

Rénghap

Geus teu kabilang lobana rénghap, mangsa lalayaran dina sagara kahirupan

Geus teu kabilang, lobana jarum érloji ngwiridkeun asma Salira

Ah, boa-boa  moal lila lalakon bakal lekasan.

Léngkah

Geus teu kaitung deui lobana léngkah, napak di bumi Salira

Tapi geuning jajauheun tina  kahadéan mah

Mangsa wanci salin jinis, sok inggis panto patobatan

nutup salalawasna.

 

 

 

Desember 2019

 

 

 

 

 

 

 

 

 

Hujan Cigondéwah

 

Disidik-sidik mah, hujan téh  lir jamparing,

Ting belesat murudul tina gondéwa langit

Ngajirim tiis, ngagebrét ngaguyur lemah.

Harita, naha anjeun bet teu ngiuhan, cigah nu sadrah narima cai patobatan

boa haté anjeun geus gudawang, sésa nancebna jamparing kahirupan.

 

Disidik-disidik mah, hujan téh lir jamparing

Ting belesat murudul  tina gondéwa langit, ngajirim cikahuripan

Harita, naha anjeun ngahaja babaseuhan

Awak laas, cigah nu miceun kakotor mangsa lawas.

Poé-poé katukang.

 

 November 2020

 

 Keur Nyai Duesseldorf*

 

Kitu geuning Nyai, kelir nasib nu tumiba

Kateger na dada anjeun, mungkus raga nu dirogahala

Ratusan kilometer geuning Nyai,  anggangna harepan tina kanyataan

Ukur peurah jeung raheut, mulas eumeurna jalan hirup

“ Jungjunan iraha datang ,megatkeun ieu kanyeri ? “

Sanajan dipungkas ku pat,

Anjeun Sadrah tumarima

 

*novel karya Zeventina

 

2016

 

SURAT  KEUR ALLEPO

 

Aya nu neumbrag kana dada, ngajeletit kana ati

Mangsa angin ngibarkeun kelir getir, ngabeberkeun warta peurih

Alan, budak leutik  nangkuban di sisi laut

Jeung Omran, budak leutik lamokot ku getih

Korban seukeutna jangjang mangsa

umpalan jaman nu leungiteun rasa

kamanusaan.

 

2016